Як падарунак ветэранам (2009 г., Літаратура і мастацтва)

ЯК ПАДАРУНАК ВЕТЭРАНАМ

Беларускі дзяржаўны акадэмічны музычны тэатр двойчы ўключыў у афішу гэтага месяца прэм'еру спектакля "Нябесны ціхаход", упершыню паказанага 8 мая, напярэдадні свята Перамогі, і прысвечанага 65-годдзю вызвалення Беларусі. "Нябесны ціхаход" напісаны ў 1995 годяе паводле аднайменнай савецкай кінакамедыі расійскім кампазітарам Маркам Самойлавым (з выкарыстаннем папулярных песень Васіля Салаўёва-Сядога "Потому, что мы пилоты , "Пора в путь-дорогу") і аўтарамі лібрэта Аляксеем Якаўлевым ды Вячаславам Вярбініным. На мінскай сцэне музычную камедыю паставілі рэжысёр Любоў Дзяменцева, мастак Іван Саўлачкоў, балетмайстар Аляксандр Бяскоў (усе трое былі запрошаны з Расіі), а таксама галоўны дырыжор тэатра Анатоль Лапуноў ды хормайстар Святлана Пятрова. У ролях – вядучыя артысты тэатра. Запланаваны два паказы новага спектакля напярэдадні Дня вызвалення, і на першы, які адбудзецца у дзённы час, тэатр запросіць ветэранаў мінулай вайны.

С. ВЕТКА. 
Фота Ігара КУЗНЯЦОВА. 
Літаратура і мастацтва. – 2009. – 26 чэрв. – С. 10. 

На здымку: сцэна са спектакля "Нябесны ціхаход".