« Назад
ВАЛЬС, ВАЛЬС, ВАЛЬС: АД СЕВАСТОПАЛЯ І ДА "НЯМІГІ"
У Дзяржаўным тэатры музычнай камедыі Беларусі – прэм'ера. Акурат 20 чэрвеня мы зможам убачыць падарунак, які падрыхтаваны ветэранам да вялікага свята – 55-ай гадавіны з дня вызвалення Беларусі ад нямецка-фашысцкіх акупантаў. У якасці падарунка была абрана не гераічная музычная камедыя Юрыя Семянякі "Пяе "Жаўранак", з другой рэдакцыі якой калісьці афіцыйна адкрываўся наш тэатр у 1971-ым, і не "Судны час" Рыгора Суруса паводле трагікамедыі "Трыбунал" Андрэя Макаёнка, што ставіўся да 40-годдзя Перамогі, і ніякі іншы твор, а менавіта рамантычная музычная камедыя Канстанціна Лістова "Севастопальскі вальс".
У складзе пастановачнай групы – галоўны рэжысёр Барыс Лагода, галоўны дырыжор Аляксандр Сасноўскі, галоўны мастак, заслужаны дзеяч культуры Беларусі Яўген Ждан, мастак па касцюмах Вольга Жалонкіна, балетмайстар Юрый Лапша, хормайстар Святлана Пятрова. У якасці яшчэ аднаго "сцэнографа" можна назваць і Міністэрства абароны Беларусі, якое выдзеліла вялізную колькасць зусім новай маскіровачнай сеткі для афармлення спектакля. Так што, не хвалюйцеся: за лічаныя гадзіны, што засталіся да прэм'еры, з дапамогай той сеткі будуць замаскіраваныя ўсе рэпетыцыйныя хібы, і мы ўбачым (і пачуем) "Севастопальскі вальс" сапраўдным каралём вальсаў. Калі не І. Штрауса, дык А. Сасноўскага, які разам з цэлай брыгадай аранжыроўшчыкаў удасканальваў партытуру. А каб яе мелодыі былі больш запамінальнымі, у спектакль дадаткова ўведзены мантаж з вядомых старэйшаму пакаленню песень ваенных гадоў.
У ролі яшчэ двух "дадаткаў" (а калі сур'ёзна – паўнапраўных удзельнікаў спектакля) – Акадэмічны ансамбль песні і танца Узброеных Сіл Рэспублікі Беларусь і Мінскі аркестр духавых інструментаў "Няміга".
Усе стваральнікі гэтага сумеснага праекта асноўнай "стратэгічнай" задачай лічаць аднаўленне характару эпохі, на якую прыходзілася маладосць сённяшніх ветэранаў. Ну, а на сцэне аднаўляць яе будуць такія нашы знакамітасці, як заслужаны артыст Украіны Арнольд Ранцанц, заслужаныя артысты Беларусі Аляксей Ісаеў, Герман Казлоў, Вячаслаў Фаменка – і ўсе-ўсе-ўсе. Так што прыходзьце – і ўсё ўбачыце. Нават калі глядзелі "Севастопальскі вальс" ў безлічы іншых пастановак, вам будзе цікава. Бо гэты спектакль – у літаратурна-сцэнічнай рэдакцыі Ірыны Шыцікавай.
Надзея БУНЦЭВІЧ. Культура. – 1999. – 19–25 чэрв. – С. 8.
|