БЫВАЙЦЕ, МАЭСТРА…

Музычная грамадскасць Беларусі панесла цяжкую страту. На 73 годзе жыцця памёр вядомы музычны дзеяч і дырыжор, член Беларускага саюза музычных дзеячаў Глеб Гаўрылавіч Аляксандраў.

Музычную адукацыю Глеб Аляксандраў атрымаў у Горкаўскай і Свярдлоўскай кансерваторыях. Працаваў дырэктарам і галоўным дырыжорам Дзяржаўнага акадэмічнага тэатра оперы і балета ў г. Уфа. З 1984 года жыццё і творчая дзейнасць Глеба Гаўрылавіча былі звязаны з Мінскам.

Працуючы дырыжорам Беларускага дзяржаўнага тэатра музычнай камедыі, ён ажыццявіў шэраг пастановак, якія мелі вялікі поспех у гледачоў. Створаны ім Дзіцячы музычны тэатр “Казка” атрымліваў высокія ўзнагароды на прэстыжных міжнародных фестывалях і конкурсах. Глеб Гаўрылавіч шчыра і самаахвярна аддаваў свой талент і багацце душы дзецям, марыў пра стварэнне ў 
Беларусі Дзяржаўнага дзіцячага музычнага тэатра і рабіў для гэтага ўсё, што мог.

Беларускі саюз музычных дзеячаў смуткуе з прычыны смерці таленавітага музыканта, арганізатара, педагога і выказвае шчырае спачуванне яго родным і блізкім.

Прэзідыум Беларускага саюза музычных дзеячаў.
Літаратура і мастацтва. – 2009. – 21 жн. – С. 11.