Прыгожа, як … сувенір (1994 г., Літаратура і мастацтва)

З маляўнічым сувенірам параўноўваюць гледачы новую прэм'еру Дзяржаўнага тэатра музычнай камедыі. Тут пастаўлены ўзор колішняй савецкай класікі – аперэта А. Стрэльнікава "Халопка". Бадай, толькі старэйшаму пакаленню публікі помніцца гэты твор – дзякуючы хоць бы мастацкаму фільму "Прыгонная актрыса" з Тамарай Сёмінай у галоўнай ролі. Увогуле ж на слыху, мабыць, некалькі фрагментаў, тыпу застольнай гусарскай песні ды прыпеву "Не выходит песня из ума – хороша ты, матушка-зима!". Ну, а тое, што можна сёння пачуць у нашым тэатры, – сапраўдная прэм'ера, бо ўпершыню музыка "Халопкі" выконваецца без купюраў, паводле ўзноўленага аўтарскага рукапісу. Спектакль атрымаўся маштабны, шматнаселены, працяглы па часе, маляўнічы вонкава. Пра ўсё астатняе паразважаем у нашых будучых публікацыях. Музычны кіраўнік новай пастаноўкі – А. Сасноўскі, рэжысура В. Цюпы, сцэнограф – У. Жданаў. У ролях – Л. Станевіч, А. Ранцанц, У. Пятроў, Г. Казлоў ды іншыя вядучыя артысты тэатра.