Музычны тэатр аднаўляе добрыя савецкія традыцыі (2012 г., Звязда)

МУЗЫЧНЫ ТЭАТР АДНАЎЛЯЕ ДОБРЫЯ САВЕЦКІЯ ТРАДЫЦЫІ

Сёння ў сталічным Музычным тэатры адбудзецца гала-канцэрт, які завершыць міжнародны тыдзень музычнага мастацтва "Наталля Гайда запрашае". Усе квіткі на гэты вечар былі раскуплены больш чым за тыдзень да мерапрыемства. Канцэрт складаецца з двух аддзяленняў: балетны дывертысмент і вакальныя нумары. Усё гэта з удзелам запрошаных тэатральных "зорак".

Беларускі дзяржаўны акадэмічны музычны тэатр праводзіць тыдзень музычнага мастацтва з удзелам музычных тэатраў Расіі, Азербайджана і Казахстана. Сярод удзельнікаў праекта — вядучыя артысты музычных тэатраў СНД. Упершыню наведала Мінск народная артыстка Расіі Галіна Пятрова, салістка Свярдлоўскага дзяржаўнага акадэмічнага музычнага тэатра, гастролі якога, дарэчы, плануюцца ў нашай сталіцы ў бліжэйшыя месяцы. З задавальненнем прыязджае да нас народны артыст Расіі Уладзімір Якаўлеў (Іркуцкі дзяржаўны музычны тэатр імя Загурскага). 4 гады таму Якаўлеў быў у Мінску на гастролях, і яго так цёпла прынялі мінскія тэатралы, што артыст ніколі не адмаўляецца ад запрашэнняў наведаць сталіцу Беларусі. Асаблівы для яго гонар — сыграць на адной сцэне разам з прымай беларускай аперэты Наталляй Гайдай. Прыехалі ў Мінск і маладыя артысты з розных гарадоў Расіі: Аляксандра Гарашчук, Андрэй Данілаў, Таццяна Клімава, а таксама азербайджанскія "зоркі" аперэты Інара Бабаева і Фарыд Аліеў. Варта адзначыць, што ўсе артысты пагадзіліся на ўдзел у беларускім праекце без ганарараў. Што сёння бывае, наогул, надзвычай рэдка. Значыць, ёсць яшчэ сапраўднае мастацтва, а мінская музычная сцэна працягвае прывабліваць прафесіяналаў.

— Ідэя такога фестывалю з'явілася спантанна. І ўсе вельмі ўзрадаваліся, — распавядае Сусана Цырук, галоўны рэжысёр Беларускага акадэмічнага музычнага тэатра, — Ні для каго не сакрэт, што пасля развалу Савецкага Саюза спыніліся штогадовыя традыцыйныя двухмесячныя ўзаемагастролі саюзных тэатраў. І ўжо цэлае акцёрскае пакаленне наогул не ведае, што гэта такое — "людзей паглядзець і сябе паказаць". Засталіся адзінкавыя тэатры ў краіне, якія дазваляюць сабе выехаць на вялікія гастролі. А тое, што ў спектаклях побач з нашымі акцёрамі з'яўляюцца запрошаныя, толькі дадае свежасці, навізны. Новыя партнёры, рэакцыі, мізансцэны. Заўжды прысутнічае элемент нечаканасці, таму што за дзве рэпетыцыі акцёры не могуць так "прыцерціся" адно да аднаго.

Беларускія гледачы мелі магчымасць убачыць чатыры звыклыя спектаклі ва ўнікальным паўімправізацыйным выкананні: "Бабін бунт" Я. Пцічкіна, "Аршын мал алан" У. Гаджыбекава, "Сільва" І. Кальмана, "Граф Люксембург" Ф. Легара.

Цікава, што тыдзень музычнага мастацтва — гэта не толькі спектаклі, але і майстар-класы, творчыя сустрэчы і нават "круглы стол" па пытаннях тэатральнага менеджменту. Так што Наталлі Гайдзе ўдалося арганізаваць, па сутнасці, сапраўдны тэатральны форум. Спадзяёмся, ён будзе квітнець і ўдасканальвацца.

— Мы хочам паказаць, што мы ўсё можам арганізаваць самі на прафесійным узроўні, — распавядае мастацкі кіраўнік мінскага Музычнага тэатра Адам Мурзіч. — І магчыма, у наступны раз у нас з'явяцца і спонсары, і дзяржаўная падтрымка.

А што тычыцца гастроляў і абмену творчым вопытам... У чэрвені на 25 дзён у Мінск з гастролямі прыедзе Екацярынбургскі тэатр музычнай камедыі. Аматары аперэты — танцуйце!

Вольга ЧАЙКОЎСКАЯ.
Фота Анжалікі ГРЭКОВІЧ.
Звязда. – 2012. – 21 крас.