У Нясвіж вярнуўся баль (Анатоль Кляшчук, "Звязда", 13.11.2012)

У НЯСВІЖ ВЯРНУЎСЯ БАЛЬ

У ноч з суботы на нядзелю нясвіжскі палац Радзівілаў стаў месцам правядзення арыстакратычнага балю. Гэта была своеасаблівая спроба адраджэння шляхецкіх манер, якія бытавалі на нашай зямлі ў мінулыя часы. Шляхта, як вядома, любіла раскошу і гульні. Але арыстакратычнае паходжанне не абмяжоўвалася толькі баляваннем. Адной з высакародных рысаў гэтай часткі грамадства была дабрачыннасць. Таму, у рамках балю і прайшла акцыя па зборы сродкаў — на рэстаўрацыю помнікаў старажытнага беларускага дойлідства — замкаў, палацаў і колішніх сядзіб. Задуманы па ініцыятыве Міністэрства культуры Беларусі менавіта як дабрачынны, праект атрымаў адпаведную гучную назву "Палацавы баль у Нясвіжы".

Для гасцей тут былі чырвоная дарожка, фаер-шоу, рыцары на конях, бляск раскошы радзівілавых пакояў і шмат музыкі.

Удзельнікамі ўрачыстасці ў начным палацы сталі лепшыя беларускія і замежныя выканаўцы: салісты оперы і балета Вялікага тэатра Беларусі і Вялікага тэатра Расіі. На балі гучалі вядомыя вальсы ў выкананні сімфанічнага аркестра Беларускага дзяржаўнага акадэмічнага музычнага тэатра пад кіраўніцтвам маэстра Аркадзя Берына.

Сярод ганаровых гасцей мерапрыемства — пераможца конкурсу "Міс свету", мадэль і актрыса з Ірландыі Разана Дэвісан, дачка вядомага спевака Крыса дэ Бурга, акцёр і спявак Дзмітрый Харацьян, саліст Дзяржаўнага акадэмічнага Вялікага тэатра Расіі Аляксандр Захараў, салістка Нацыянальнага акадэмічнага Вялікага тэатра оперы і балета Беларусі Аксана Волкава, сусветна вядомая балерына Анастасія Валачкова.

Вандруючы па палацавых залах, госці балю здзейснілі своеасаблівае падарожжа скрозь стагоддзі. Многія з іх прызнаваліся пазней, што адчувалі непасрэдную прысутнасць колішніх гаспадароў, чые імёны назаўсёды знітаваны з гісторыяй і культурай не толькі Нясвіжа — усёй Еўропы: Барбары і Уршулі Радзівіл, Мікалая Сіроткі і Пане Каханку…

Гісторыя Нясвіжа ажывае.

Анатоль КЛЯШЧУК. 
Фота аўтара.
Звязда. – 2012. – 13 лістап. – С. 1, 8.